Sipas të dhënave të përpunuara nga Eurostat, kostoja e shportës së mallrave dhe shërbimeve në Shqipëri ka shënuar rritje të ndjeshme gjatë dekadës së fundit. Treguesi i nivelit të çmimeve, i matur përmes barazisë së fuqisë blerëse (PPP), konfirmon se çmimet janë rritur me ritme shumë më të shpejta sesa të ardhurat e popullsisë.
Ndër produktet që shfaqin rritjen më të lartë krahasuar me mesataren europiane, veçohen:
- Pijet alkoolike: Ky grup është 59% më i shtrenjtë se mesatarja e BE-së, duke regjistruar një indeks prej 159%.
- Qumështi, bulmeti dhe vezët: Ky grup i domosdoshëm është 35.6% më i shtrenjtë se mesatarja e BE-së, duke shënuar rritje krahasuar me 32.5% që ishte në vitin 2024. Produktet e përpunimit të qumështit, si kosi, kushtojnë më shtrenjtë se në shumë shtete të tjera të Europës.
- Pajisjet elektroshtëpiake: Këto artikuj po rëndojnë gjithashtu mbi buxhetin e konsumatorëve me indekse çmimesh që tejkalojnë nivelet e mëparshme.
Sipas analizave, indeksi i PPP-së shërben si një tregues krahasues që eliminon efektin e kursit të këmbimit dhe diferencave në të ardhura, duke pasqyruar realisht koston e një shporte të njëjtë mallrash. Industria e përpunimit të qumështit ka vënë në dukje se këto çmime të larta vijnë si pasojë e kostove të shtuara të prodhimit dhe problemeve në zinxhirin e vlerës.