Çmimi i naftës në Shqipëri ka arritur 202 lekë/litr që prej nisjes së luftës në Iran. Sulmi ndaj objekteve të prodhimit të hidrokarbureve ka çuar në rritjen e çmimit ndërkombëtar të naftës bruto Brent në 109.18 dollarë për fuçi.
Ish-ministri i Ekonomisë Arben Malaj paralajmëron se rritja mund të thellohet dhe qeveria duhet të ndërhyjë me lehtësime për qytetarët. "Problemi kryesor është se nuk dimë sa e gjatë dhe sa e thellë është kjo. Duhet paketë sociale, sepse rritja e çmimit do të shkojë te fermeri, te shërbimet dhe konsumatori do ta ndjejë menjëherë. Prandaj qeveritë e mira përgatisin një paketë për çdo rast krize dhe sa po ndodh kriza e bëjnë funksionale", u shpreh Malaj.
Ai ka studiuar reagimet e vendeve europiane ndaj krizës nga tensionet në Lindjen e Mesme, të cilën e sheh si luftë ekonomike më shumë se ushtarake. Malaj sugjeron që qeveria shqiptare të ndjekë një mesatare të ndihmave të shteteve të zhvilluara:
- Në Greqi çdo fitim i kompanive nga rritja e çmimit shkon në fond social për të mbështetur njerëzit që kanë nevojë, është vendosur kufi për rritjen e çmimit dhe heqje e TVSH-së për mallrat ushqimore.
- Në Gjermani është dhënë ndihmë për transportin urban të punonjësve për shkak të rritjes së kostos së transportit.
Konfindustria e naftës i ka bërë thirrje qeverisë të zbatojë një paketë fiskale lehtësuese, duke propozuar edhe uljen e taksës së qarkullimit të automjeteve.