Çmimi mesatar i një litri nafte në stacionet e karburantit në Gjermani ka arritur 2,32 euro të enjten, duke vendosur një rekord të ri që tejkalon atë të marsit 2022. Në disa vende, çmimi ka shkuar deri në 3 euro, ndërsa benzina super ka regjistruar mesatare 2,19 euro për litër, po ashtu rekord historik. Kjo rritje ka ndodhur pak para festave të Pashkëve.
Rritja erdhi një ditë pasi hynë në fuqi masat e qeverisë gjermane, që nga 1 prilli lejojnë stacionet e karburantit të rrisin çmimet vetëm një herë në ditë, në mesditë. Klubi Gjerman i Automobilave (ADAC) ka kritikuar ashpër këtë zhvillim, duke theksuar se çmimet e naftës bruto ranë në gjysmën e parë të javës. Sipas ADAC-ut, "frika se kompanitë e naftës, të cilave tani u lejohet të rrisin çmimet vetëm një herë në ditë, do ta bënin këtë në mënyrë drastike për të mbrojtur veten, ka rezultuar e justifikuar".
Kjo situatë ka rritur presionin mbi qeverinë gjermane, e cila akuzohet për reagim të dobët ndaj rritjes së çmimeve të energjisë. Ministri i Financave dhe zëvendëskancelari Lars Klingbeil nga Partia Socialdemokrate e Gjermanisë (SPD) i ka dërguar një letër disa ministrive të enjten, duke kërkuar masa urgjente për të parandaluar rritjen e çmimeve të energjisë dhe inflacionin.
Po diskutohet futja e lehtësirave tatimore shtesë për udhëtimet me automjet, si dhe ulja e taksave mbi produktet energjetike, në linjë me vendet e tjera të Bashkimit Evropian. Ndërkohë, Polonia ka njoftuar se do të monitorojë situatën në zonën kufitare me Gjermaninë dhe do të reagojë nëse është e nevojshme, për shkak të mungesave të karburantit të shkaktuara nga shoferët gjermanë që mbushin rezervuarët atje, ku çmimet janë më të ulëta.