Cole Tomas Allen, 31-vjeçar, u deklarua i pafajshëm të hënën në gjykatë federale në Uashington DC për katër akuzat që rëndojnë ndaj tij, mes të cilave tentativa për vrasjen e Presidentit Donald Trump dhe sulm ndaj një oficeri të Shërbimit Sekret.
Sipas prokurorëve, më 26 prill, Allen hyri me forcë në një pikë kontrolli sigurie në hotelin ku zhvillohej darka vjetore e korrespondentëve të Shtëpisë së Bardhë. Presidenti Trump dhe zyrtarë të lartë të administratës ndodheshin në një kat tjetër të godinës. Ai dyshohet se hapi zjarr ndaj një agjenti, duke mbajtur me vete armë gjahu, pistoletë dhe thika. Hetuesit thonë se Allen kishte udhëtuar me tren drejt Uashingtonit dhe kishte rezervuar një dhomë në hotel.
Gjatë seancës, Allen u paraqit me duar dhe këmbë të prangosura pranë avokatëve të tij, Eugene Ohm dhe Tezira Abe. Ai nuk foli vetë, por avokatët deklaruan pafajësinë e tij.
Avokatët mbrojtës ngritën një mocion për përjashtimin e prokurores amerikane për DC, Jeanine Pirro, si dhe të Prokurorit të Përgjithshëm në detyrë Todd Blanche, për shkak të pranisë së tyre në darkë. Ata argumentuan se këta zyrtarë mund të konsiderohen viktima ose objektiva të mundshme, duke krijuar konflikt interesi. Ohm theksoi se Pirro është mikeshë e afërt me Trump dhe kërkoi informacion shtesë mbi zyrën e saj, duke paralajmëruar mundësinë e përjashtimit të të gjithë zyrës së prokurorisë.
Gjyqtari Trevor McFadden, i emëruar nga Trump, u shpreh skeptik ndaj kësaj kërkese. Ai tha se do të habitej nëse Pirro dhe të tjerët konsideroheshin viktima ligjore, pasi nuk e kishin parë incidentin. McFadden nuk mori vendim të menjëhershëm dhe kërkoi sqarime shtesë.