Cole Allen, personi i armatosur që hapi zjarr në darkën e Trump-it me gazetarët në Uashington, dyshohet se u dërgoi anëtarëve të familjes një letër me përmbajtje kërcënuese rreth 10 minuta para sulmit.
Sipas burimeve të cituara nga mediat amerikane, në letër Allen e përshkruante veten si „Vrasësi Federal Miqësor” dhe shprehte synimin për të sulmuar zyrtarë të administratës Trump. Ai rendiste objektivat sipas prioritetit dhe përshkruante hyrjen në hotel: „Gjëja e parë që vura re duke hyrë në hotel ishte ndjenja e arrogancës. Hyra me disa armë me vete dhe askush nuk dyshoi”.
Letra përmban gjuhë të ashpër ndaj presidentit dhe akuza të rënda, me motive ideologjike e politike. Allen shpjegonte mënyrën e përdorimit të armëve, duke pretenduar se synonte të minimizonte viktimat, por ishte i gatshëm për dëme më të mëdha. Ai shkruante: „Të kthesh faqen tjetër kur ‘dikush tjetër’ është i shtypur nuk është sjellje e krishterë, është bashkëfajësi në krimet e shtypësit”. Ai iu referua besimit të tij të krishterë si justifikim për reagim ndaj padrejtësive të perceptuara dhe përmendi politikat ndaj emigracionit si dhe operacionet kundër trafikut të drogës.
Dokumenti u dorëzua në polici nga një i afërm i Allen-it. Prokurori i Përgjithshëm në detyrë, Todd Blanche, deklaroi se hetuesit besojnë se Allen kishte udhëtuar me tren nga Los Angeles drejt Uashingtonit, nëpërmjet Çikagos, ndoshta për të shmangur kontrollet më të rrepta.
Përditësime
- Një zyrtar amerikan konfirmoi se Cole Allen dërgoi një letër rreth 10 minuta para sulmit në Uashington.
- Në letër, ai shkruante: "Të kthesh faqen tjetër është kur vetë je i shtypur. Unë nuk jam personi i përdhunuar në një kamp paraburgimi. Nuk jam peshkatari i ekzekutuar pa gjyq. Nuk jam një nxënës shkolle i hedhur në erë, apo një fëmijë i uritur."