Portieri i Real Madridit, Thibaut Courtois, foli para mediave në prag të ndeshjes së kthimit kundër Benficës në Bernabéu, duke u ndalur te polemikat për akuzat e racizmit ndaj Vinícius Júnior nga lojtari i Benficës, Gianluca Prestianni.
Courtois theksoi se ekipi beson plotësisht brazilianin, i cili ka përjetuar episode të ngjashme në të kaluarën. "Ne jemi 100% me Vinícius", deklaroi ai, duke shtuar se klubi qëndron plotësisht në krah të tij. Ai shpjegoi se Vinícius vendosi vetë që ndeshja të vazhdojë pas incidentit, por theksoi se kjo nuk duhet të mbetet në dorën e lojtarit.
Sa i përket deklaratave të trajnerit të Benficës, José Mourinho, i cili përmendi festimin e Vinícius pas golit për të minimizuar incidentin, Courtois u shpreh: "Mourinho është Mourinho dhe mbron klubin e tij, por më shqetëson përdorimi i festimit të Vinícius për të justifikuar një akt të dyshuar racizmi". Ai vuri në dukje se festimet kundër Real Madridit janë më të mëdha, por kjo nuk legjitimon fyerjet.
Belgu dënoi gjithashtu komentet e José Luis Chilavert dhe Rui Costa, duke i cilësuar të papërshtatshme. Ai kërkoi nga UEFA një mesazh të qartë kundër racizmit dhe homofobisë, duke përmendur gjestet majmuni nga tifozët e Benficës në tribuna. "Racizmi dhe homofobia nuk kanë vend në futbollin e sotëm", tha ai.
UEFA ka pezulluar përkohësisht Prestianni për një ndeshje, ndërsa rregullat parashikojnë dënime më të rënda për fyerje bazuar në orientimin seksual. Courtois la vendimet përfundimtare te institucionet.