José Mourinho, trajneri i Benficës, ka reaguar për incidentin midis lojtarit të tij Gianluca Prestianni dhe Vinicius Juniorit të Real Madridit, në ndeshjen e parë të playoff-it të Ligës së Kampionëve. Ndeshja, e luajtur në Estadio da Luz në Lisbonë, u mbyll me fitoren 1-0 të Real Madridit.
Sulmuesi brazilian Vinicius Junior akuzoi argjentinasi Gianluca Prestianni se e kishte ofenduar me fjalë raciste, duke e quajtur "majmun", pas golit të shënuar nga braziliani. Benfica dhe Prestianni kanë mohuar akuzat. UEFA ka nisur hetimin dhe e ka pezulluar lojtarin e Benficës, i cili nuk mund të luajë në Ligën e Kampionëve derisa të sqarohen faktet. Në rast se vërtetohet fyerja raciste, mund të vijë pezullim deri në 10 ndeshje.
Mourinho theksoi parimet e klubit dhe të tijat personale kundër racizmit. "Nëse lojtari im nuk i respekton parimet e Benficës, që janë edhe të miat, karriera e tij me një trajner të quajtur Mourinho dhe në një klub si Benfica përfundon", deklaroi ai. Trajneri portugez mbështeti prezumimin e pafajësisë, por vendosi kushte: "Duhet të vendos shumë 'nëse' përpara. Nëse është vërtet fajtor, nuk do ta shoh më si më parë dhe për mua mbaron gjithçka".
Ai kritikoi UEFAnë për mos përfshirjen e "nëse" në komunikim dhe refuzoi të mbështeste pa kushte lojtarin, duke thënë se ka dashuri për të, por jo mbështetje të pakushtëzuar.
Sa i përket të ardhmes së tij, Mourinho mohoi spekulimet për rikthim te Real Madridit. "Dua të qëndroj te Benfica dhe të respektoj kontratën. Objektivi ishte të thoja se dëshiroja të qëndroja këtu", u shpreh ai, duke sqaruar se fokusohet në ligën reale, jo virtuale.