Dani Olmo ndihmon familjet kroate me donacione nga paga

Mesfushori i Barcelona-s dhe i kombëtares së Spanjës, Dani Olmo, ka ndërmarrë një nismë humanitare për të ndihmuar familjet dhe komunitetet sportive në qytetet kroate të Vukovarit dhe Slavonski Brod. Kjo mbështetje financiare, e cila ka nisur që nga periudha kur ai luante për RB Leipzig, vazhdon edhe pas transferimit të tij në Spanjë. Detajet e këtij gjesti u bënë publike nga agjenti i lojtarit, Andy Bara, gjatë një paraqitjeje në një podcast. Sipas Barës, futbollisti kontribuon me 2% të pagës së tij vjetore bruto. Ndërkohë, të dhënat nga organizata e solidaritetit Common Goal, përmes së cilës kryhen këto donacione, e përcaktojnë kontributin në 1%. Common Goal, e themeluar nga ish-futbollisti Juan Mata, bashkëpunon me sportistë profesionistë për të mbështetur projekte sociale në mbi 100 vende të botës. Vetë Dani Olmo e konfirmoi nismën gjatë një konference për shtyp në prag të ndeshjes së Nations League mes Kroacisë dhe Spanjës. Ai shpjegoi se pas largimit nga Dinamo Zagreb në vitin 2020, ku qëndroi për gjashtë vite, u ndje borxhli ndaj Kroacisë dhe kërkoi një mënyrë për t’i kontribuar vendit që ndihmoi në zhvillimin e tij si futbollist. Përveç mbështetjes financiare, Olmo ka vizituar zonat e prekura nga pasojat e luftës së viteve ’90, ku ka marrë pjesë edhe në aktivitete sportive me fëmijët e atyre komuniteteve.