Mesfushori i Spanjës, Dani Olmo, ka folur për herë të parë pas incidentit të ndodhur në përfundim të finales kundër Argjentinës, ku u përfshi në një konfrontim me Roberto Ayalan, pjesëtar i stafit teknik argjentinas. Ndonëse momenti nuk u transmetua drejtpërdrejt, pamjet e bëra virale në rrjetet sociale dëshmojnë se Ayala fillimisht u përplas me Eric Garcian dhe më pas preku Olmon në fytyrë.
Në deklaratat e tij, Olmo pranoi se instinkti i parë ishte një reagim i menjëhershëm fizik, por vendosi të përmbahej për të shmangur përshkallëzimin e situatës. "Kur dikush nga stafi i ekipit kundërshtar vendos duart në fytyrën time në atë mënyrë, instinkti im i parë ishte t’ia ktheja menjëherë. Jam njeri dhe emocionet janë të forta, por u ndala sepse nuk doja të jepja një shembull të keq për fëmijët dhe tifozët që na shihnin. Si futbollistë kemi përgjegjësi dhe duhet të jemi model për brezat e rinj", deklaroi mesfushori spanjoll.
Lidhur me sjelljen e delegacionit argjentinas, Olmo u shpreh se nuk dëshiron të fokusohet te veprimet e tyre negative. Sipas tij, futbollistët e Spanjës dëshmuan klas si në fushë ashtu edhe jashtë saj. Duke analizuar atmosferën pas ndeshjes, Olmo veçoi Lionel Messin si të vetmin anëtar të ekipit argjentinas që ruajti qetësinë dhe dinjitetin gjatë ceremonisë, ndërsa shtoi se pjesa tjetër e skuadrës dukeshin sikur kërkonin arsye për konflikt.
Incidenti ka shkaktuar reagime të shumta, ndërsa veprimi i Olmos është vlerësuar për vetëpërmbajtje. Ndërkohë, raportohet se FIFA ka nisur hetimet për sjelljen e anëtarëve të Argjentinës gjatë ceremonisë së dorëzimit të trofeut.