Eksperti i çështjeve të Ballkanit, Daniel Serwer, në një intervistë për A2CNN, theksoi nevojën që Kosova të përgatitet për një ndryshim të mundshëm të pranisë ushtarake amerikane në rajon. Pavarësisht dëshirës për ruajtjen e trupave aktuale, ai nënvizoi se një tërheqje e pjesshme është një skenar që nuk duhet përjashtuar. Në këtë kontekst, Serwer vlerësoi se Shqipëria, përmes angazhimit të saj në NATO, mund të luajë një rol kyç në garantimin e sigurisë së fqinjit të saj.
Sipas ekspertit amerikan, anëtarësimi i Kosovës në NATO dhe Bashkimin Evropian mbetet prioriteti kryesor për stabilitetin afatgjatë. Megjithatë, ai ngriti dilema lidhur me gatishmërinë politike aktuale të vendit, duke vënë në dyshim mundësinë e pranimit në aleancë pa një qeverisje të qëndrueshme.
Lidhur me qëndrimet e Beogradit, Serwer paralajmëroi për ambiciet e presidentit serb, Aleksandër Vuçiq. Ai deklaroi se Serbia po shfrytëzon situatën gjeopolitike për të synuar veriun e Kosovës. Sipas Serwer, ky veprim shihet si një mundësi strategjike, ndërsa vlerësoi se pushtimi i pjesëve të tjera të territorit do të shkaktonte një konflikt gueril shkatërrues për vetë Serbinë.