Departamenti Amerikan i Shtetit (DASH) ka publikuar raportin për Komitetin e Marrëdhënieve me Jashtë në Senatin e Shteteve të Bashkuara, ku shpjegon arsyet e nominimit të Eric Wendt si ambasador i Jashtëzakonshëm dhe Fuqiplotë i SHBA në Shqipëri. Nominimi është bërë nga administrata Trump.
Eric Wendt, gjeneral-lejtnant në pension, shërben si profesor në Shkollën Pasuniversitare Detare në Monterey, ku jep mësim për komandë dhe lidership. Gjatë karrierës së tij mbi 34-vjeçare ushtarake, ka mbajtur pozicione të larta drejtuese.
Përvoja në NATO dhe Shqipëri
Si komandant i Shtabit të Operacioneve Speciale të NATO-s, Wendt ka drejtuar të gjitha forcat speciale të Aleancës, përfshirë njësitë shqiptare. Ai ka bashkëpunuar drejtpërdrejt me drejtues dhe trupa në Shqipëri.
Shërbimi në Afganistan dhe DASH
Në Afganistan, ka shërbyer një vit si zëvendëskomandant rajonal, duke mbikëqyrur operacione që përfshinin trupa shqiptare. Për dy vjet ka punuar në Ambasadën e SHBA në Jerusalem, ku drejtoi një koalicion me tetë vende si koordinator i sigurisë mes Izraelit dhe Autoritetit Palestinez, duke raportuar drejtpërdrejt te Sekretari i Shtetit.
Arsimi dhe aftësitë
Wendt është diplomuar në Universitetin e Kalifornisë në Santa Barbara dhe në Shkollën Pasuniversitare Detare në Monterey. Zotëron gjuhët arabisht dhe koreisht. Është përfitues i dekoratave si Medalja për Shërbim të Dalluar në Mbrojtje.
Raporti nënvizon aftësinë e tij për të menaxhuar struktura komplekse shumëkombëshe dhe ndërinstitucionale, si dhe njohuritë në rajonin evropian, duke e bërë të përshtatshëm për postin në Tiranë.