Deputeti Daut Haradinaj ka njoftuar zyrtarisht se do të lirojë pozitën e tij në legjislativ, duke nënvizuar se përgjegjësia ndaj vendit nuk kufizohet vetëm në një funksion institucional. Përmes një deklarate publike, ai ka falënderuar qytetarët për besimin e dhënë, duke sqaruar se largimi nga Kuvendi i Kosovës është pjesë e një angazhimi më të gjerë publik dhe kombëtar.
Haradinaj ritheksoi se zëri i tij do të mbetet aktiv për çështjet me interes për vendin. "Siç kam premtuar që në fillim, do ta liroj pozitën e deputetit për t’u dhënë hapësirë kolegëve të mi. Këtë e bëj me bindjen se përgjegjësia dhe kontributi ndaj vendit nuk maten vetëm me një pozitë", u shpreh ai.
Sipas tij, angazhimi i tij do të jetë i pranishëm kudo ku kërkohet për interesin e qytetarëve, duke shtuar në përfundim se për të, Kosova mbetet gjithmonë mbi të gjitha.