Klubi i Real Madridit ka njoftuar zyrtarisht se mbrojtësi austriak David Alaba do të largohet nga skuadra në përfundim të këtij edicioni. Në komunikatën e publikuar, gjiganti spanjoll shprehu mirënjohjen për kontributin e lojtarit, i cili iu bashkua madrilenëve në vitin 2021 si lojtar i lirë nga Bayern Munich.
Gjatë periudhës së tij pesëvjeçare në Madrid, Alaba ka qenë pjesë e një cikli të suksesshëm, duke fituar gjithsej 11 trofe, përfshirë dy tituj të La Ligas dhe dy trofe të UEFA Champions League. Përkundër suksesit kolektiv, karriera e 33-vjeçarit në Spanjë është ndikuar nga dëmtimet e shpeshta, të cilat kanë reduktuar minutazhin e tij në fushë.
Ndeshja e fundit për mbrojtësin austriak do të zhvillohet këtë të diel, ku klubi pritet t'i bëjë një nderim të veçantë. Largimi i tij shënon një tjetër ndryshim të rëndësishëm në repartin defensiv të "Los Blancos", ndërsa klubi po vijon planet për përforcimin e skuadrës për sezonin e ardhshëm.