E ardhmja e mesfushorit Luka Modric ka marrë vëmendje të shtuar pas deklaratave të ish-sulmuesit Davor Suker. Në një prononcim për "Radio Marca", Suker la të kuptohet se rikthimi i kroatit në stadiumin "Santiago Bernabeu" është një mundësi konkrete pas përfundimit të turneut botëror, ndonëse nuk specifikoi rolin që do të marrë lojtari në klubin madrilen.
Luka Modric iu bashkua Milanit verën e kaluar me një kontratë njëvjeçare, e cila përmban opsionin për zgjatje. Ndonëse drejtuesit e klubit italian janë të gatshëm të aktivizojnë klauzolën e rinovimit, vendimi mbetet në dorën e futbollistit. Raportimet e fundit tregojnë se Modric po e vlerëson seriozisht mundësinë e pensionimit, pas dështimit të Milanit për t’u kualifikuar në Ligën e Kampionëve dhe largimit të trajnerit Massimiliano Allegri.
I pyetur nëse kroati do t'i bashkohet stafit të Jose Mourinhos apo do të marrë një pozicion administrativ te Real Madridi, Davor Suker refuzoi të jepte detaje të mëtejshme. Ai deklaroi se duhet pritur përfundimi i angazhimeve ndërkombëtare për të mësuar vendimin përfundimtar të lojtarit. Gjatë sezonit 2025/26, Modric regjistroi 37 paraqitje me fanellën e Milanit, duke shënuar dy gola dhe duke dhënë tri asistime.