Gjatë dëgjesës së radhës të Komisionit të Posaçëm për Reformën Administrativo-Territoriale, të zhvilluar në qytetin e Dibrës, situata u tensionua mes anëtarit të këtij komisioni, Xhelal Mziu, dhe bashkëkryetarit Arbjan Mazniku.
Shkaku i debatit ishte mosrespektimi i afatit kohor prej 3 minutash të vendosur për çdo fjalim. Moderatorët dhe Arbjan Mazniku kërkuan ndërprerjen e fjalës së Xhelal Mziut, me argumentin se koha në dispozicion kishte përfunduar. Nga ana e tij, deputeti demokrat kundërshtoi këtë kufizim, duke kërkuar vijimin e fjalës dhe duke iu drejtuar Arbjan Maznikut me komente mbi përvojën e tij.
Ndërhyrje në debat pati edhe nga deputeti demokrat Luçiano Boçi, i cili mbështeti kërkesën e Xhelal Mziut për të vazhduar fjalën. Arbjan Mazniku theksoi se rregullat janë një element thelbësor i funksionimit të komisionit dhe se deri në atë moment ishin zhvilluar 8 dëgjesa të tjera, ku këto rregulla ishin zbatuar për të gjithë pjesëmarrësit pa përjashtim.