Rregullorja e re e brendshme për sigurinë, rendin dhe rregullat e sjelljes në ambientet e Gjykatës së Posaçme të Shkallës së Parë Kundër Korrupsionit dhe Krimit të Organizuar (GJKKO) ka nxitur reagime të shumta. Dokumenti, i cili është funksional prej datës 1 shtator 2026, ndalon përdorimin e telefonave dhe kamerave nga përfaqësuesit e medias gjatë seancave gjyqësore.
Në një përgjigje zyrtare për Top Channel, Delegacioni i Bashkimit Evropian në Shqipëri deklaroi se është në dijeni të këtyre ndryshimeve, të cilat gjykata i ka argumentuar me nevoja specifike organizative, operacionale dhe të sigurisë. BE-ja theksoi se do të vijojë të ndjekë nga afër zhvillimet në kuadër të negociatave për anëtarësimin e Shqipërisë, duke shprehur gatishmërinë për të ofruar ekspertizë të specializuar për sistemin gjyqësor dhe komunitetin mediatik. Qëllimi është gjetja e një ekuilibri të drejtë midis masave të sigurisë dhe transparencës së proceseve gjyqësore, në përputhje me standardet evropiane.
Kufizimet kanë sjellë kundërshti edhe nga Dhoma Kombëtare e Avokatisë. Kryetari i saj, Maksim Haxhia, njoftoi mbajtjen e një mbledhjeje urgjente të martën në Tiranë për të shqyrtuar pasojat e rregullores, e cila prek edhe punën e avokatëve. Burime pranë Këshillit të Përgjithshëm të avokatisë kanë lënë të hapur mundësinë e një bojkoti të seancave gjyqësore, duke përfshirë ato në themel dhe masat e sigurimit personal, nëse nuk gjendet një zgjidhje për këto kufizime.
Ndërkohë, organizata “Safe Journalist” i është bashkuar debatit publik, duke kërkuar zyrtarisht rishikimin e rregullores. Sipas këtij komuniteti, dispozitat e reja rrezikojnë të cenojnë aksesin në informacion dhe ushtrimin e lirë të detyrës nga ana e gazetarëve gjatë raportimit të proceseve gjyqësore.