Përplasja filloi pas një komunikate për shtyp të Bashkimit Demokratik të Minoritetit Etnik Grek (OMONIA), e cila akuzoi deputetin Ardit Bido për përdorim të gjuhës së urrejtjes ndaj Redi Muçit, deputet i Lëvizjes Bashkë. Sipas OMONIA-s, Bido ka ushtruar "dhunë retorike" në një emision televiziv ndaj një kolegu që i përket origjinës dhe identitetit helenik, duke tejkaluar standardet e komunikimit.
Nga ana e tij, Ardit Bido iu kundërpërgjigj duke e cilësuar mbrojtjen që OMONIA i bën Redi Muçit si konfirmim të lidhjeve ideologjike dhe politike mes tyre. Bido ngriti pyetjen mbi arsyet pse një organizatë e minoritetit grek, e drejtuar nga Vangjel Dule, mbështet një lëvizje që ai e përshkroi si "marksiste dhe neokomuniste".
Deputeti socialist theksoi se qëndrimi i tij nuk ka asnjë lidhje me kundërshtimin ndaj minoritetit grek, marrëdhëniet me të cilin i konsideron korrekte. Sipas tij, protesta në Zvërnec duhet të mbetet një lëvizje qytetare e përqendruar te shqetësimet reale të banorëve dhe nuk duhet të devijohet drejt axhendave të tjera politike. Bido paralajmëroi se do të vazhdojë të kundërshtojë çdo përpjekje për të futur elemente të politikës greke në projektet lokale të zhvillimit, duke i konsideruar ato të huaja për interesat e komunitetit lokal.