Gjatë seancës plenare të zhvilluar më 30 qershor, një përplasje verbale u regjistrua mes deputetit Gazment Bardhi dhe ministrit Blendi Gonxhja lidhur me koncertin e paralajmëruar të reperit amerikan Kanye West.
Gazment Bardhi i kërkoi mazhorancës anulimin e aktivitetit, duke argumentuar se artisti është përfshirë në polemika për deklarata antisemite. Ai kritikoi qeverinë, duke u shprehur se koncertet e këtij artisti janë anuluar në vende të tjera për shkak të qëndrimeve të tij, ndërsa e akuzoi ministrin për standarde të dyfishta.
Nga ana tjetër, ministri Blendi Gonxhja hodhi poshtë pretendimet se koncerti ka lidhje me aktualitetin politik apo protestat në vend. Ai deklaroi se ky event është përgatitur që në muajin janar dhe shërben për të forcuar reputacionin e Shqipërisë në arenën ndërkombëtare.
Sipas ministrit, Kanye West ka mbajtur koncerte në disa shtete, përfshirë Holandën, Spanjën, Portugalinë, Turqinë, Gjeorgjinë dhe SHBA. Gonxhja e cilësoi koncertin si një ndër eventet më elitare që do të ndikojë pozitivisht në turizmin dhe markën e vendit, duke u bërë thirrje kritikëve të mos shpifin për çështje që ndihmojnë zhvillimin kulturor.