Përgatitjet për koncertin e artistit ndërkombëtar Kanye West në Tiranë kanë hyrë në fazën operative. Autoritetet po punojnë për ndërtimin e një stadiumi provizor në Kashar, i cili do të presë këtë spektakël më 11 korrik.
Ministri i Turizmit, Kulturës dhe Sportit, Blendi Gonxhja, bëri me dije se është zhvilluar një takim organizativ ndërinstitucional për të koordinuar masat e nevojshme për garantimin e mbarëvajtjes së këtij eventi. Gjatë takimit u diskutua vendosja e standardeve të larta të sigurisë, organizimit dhe mikpritjes, të cilat janë thelbësore për një shfaqje të këtyre përmasave.
Sipas Gonxhes, ky aktivitet përfaqëson një mundësi të jashtëzakonshme për promovimin e Shqipërisë në arenën globale. Ministri vlerësoi se organizimi i këtij koncerti do të ndikojë pozitivisht në rritjen e turizmit dhe ekonomisë lokale, duke e konsoliduar vendin si një destinacion konkurrues dhe të besueshëm për ngjarje të mëdha ndërkombëtare në fushën e artit dhe argëtimit.