Në seancën plenare të Kuvendit u zhvillua debat për projektligjin e "Portës së Alpeve", që parashikon një hua prej 100 milionë eurosh për qarkun e Shkodrës. Deputetja e Partisë Demokratike për Shkodrën, Greta Bardeli, kërkoi garanci se projekti nuk do të kthehet në propagandë dhe nuk do të rrisë borxhin publik.
Ministri i Infrastrukturës dhe Energjisë, Enea Karakaçi, tha se investimi është i dedikuar vetëm për qarkun e Shkodrës dhe përfshin ndërtimin e rrugëve ndërlidhëse, përmirësimin e transportit publik dhe lidhjen mes bregdetit dhe Alpeve. Ai shtoi se financimi nuk rrit borxhin publik dhe se 50 milionë euro të tjera janë angazhuar nga KfW-ja.
Karakaçi mohoi çdo lidhje mes projektit dhe "Paketës së Maleve", duke sqaruar se njëra ka të bëjë me investime publike dhe tjetra me investime private. Ai i ftoi deputetët e opozitës që të mbështesin masën nëse janë dashamirës të qarkut.
Kreu i grupit parlamentar të Partisë Socialiste, Taulant Balla, apeloi për unitet dhe tha se gjatë qeverisjes së Edi Ramës janë investuar 1.3 miliardë euro vetëm në qarkun e Shkodrës. Ai theksoi se marrëveshja siguron standarde të larta transparence dhe u bëri thirrje deputetëve të lënë mënjanë urdhrat partiakë.
Përditësime
Ministri Enea Karakaçi iu përgjigj drejtpërdrejtë Eno Bozdo dhe Ina Zhupa në Kuvend. Ai listoi vendet përfituese pa numra specifikë dhe mohoi lidhjen me Paketën e Maleve, duke konfirmuar se Ministria e Turizmit nuk ishte njoftuar. Projekti me 100 milionë euro financohet nga Banka Europiane e Investimeve dhe KfW dhe mbulon zonën nga Velipoja deri në Alpe me modernizim të transportit publik.