Një delegacion nga Prokuroria e Posaçme Kundër Korrupsionit dhe Krimit të Organizuar (SPAK) e Shqipërisë zhvillon vizitë zyrtare në Kosovë. Delegacioni, i kryesuar nga drejtuesi i SPAK-ut Klodjan Braho, u prit në takim nga ushtruesi i detyrës së Kryeprokurorit të Shtetit Agron Qalaj.
Qalaj shoqërohej nga prokurorët e Zyrës së Kryeprokurorit Aleksandër Lumezi dhe Laura Pula, si dhe nga kryeprokurori i Prokurorisë Speciale Blerim Isufaj.
Gjatë takimit, Qalaj njoftoi delegacionin shqiptar për funksionimin e sistemit prokurorial në Kosovë, strukturën organizative, kompetencat e prokurorive dhe sfidat në realizimin e misionit për sundimin e ligjit.
Palët riafirmuan angazhimin e përbashkët institucional për forcimin e sundimit të ligjit në të dy shtetet. U diskutua ngritja e nivelit të bashkëpunimit, koordinimi dhe efikasiteti në luftën kundër korrupsionit dhe krimit të organizuar.
Delegacioni u dakordua se forcimi i bashkëpunimit ndërmjet prokurorive në fushën e drejtësisë penale është thelbësor për përballimin e sfidave të përbashkëta dhe trajtimin e çështjeve me interes të ndërsjellë.
Pjesë e delegacionit ishin edhe ish-drejtuesi i SPAK-ut Altin Dumani dhe prokurorja në Eurojust Fatjona Memçaj.
Përditësime
Delegacioni i SPAK-ut vizitoi Kosovën më 9 mars për të forcuar bashkëpunimin kundër korrupsionit.