Prokuroritë speciale të Kosovës dhe të Shqipërisë nënshkruan të hënën në Prishtinë një marrëveshje për krijimin e ekipeve të përbashkëta hetimore. Marrëveshja u nënshkrua gjatë një takimi pune mes Prokurorisë Speciale të Kosovës dhe Prokurorisë së Posaçme Kundër Korrupsionit dhe Krimit të Organizuar (SPAK).
Kryeprokurori i Prokurorisë Speciale të Kosovës, Blerim Isufaj, dhe shefi i SPAK-ut, Klodjan Braho, shprehën gatishmërinë për angazhim të përbashkët për të çuar përpara bashkërendimin ndërinstitucional. Delegacioni shqiptar u prit gjithashtu nga ushtruesi i detyrës së kryeprokurorit të Shtetit, Agron Qalaj.
Gjatë takimit u riafirmua angazhimi institucional për forcimin e sundimit të ligjit në të dy shtetet. Palët diskutuan ngritjen e nivelit të bashkëpunimit, koordinimin dhe efikasitetin në luftën kundër krimit. Forcimi i bashkëpunimit në fushën e drejtësisë penale u vlerësua si thelbësor për përballimin e sfidave të përbashkëta dhe trajtimin e çështjeve me interes të ndërsjellë.
Bashkëpunimi i mëparshëm
Autoritetet e Kosovës dhe Shqipërisë kanë kryer operacione të përbashkëta kundër krimit të organizuar. Në vitin 2024, me mbështetje nga Eurojust dhe Europol, shkatërruan një grup trafiku armësh. Të dyshuarit furnizonin, transportonin dhe shisnin armë e materiale shpërthyese, duke krijuar rrugë importi-eksporti drejt Bashkimit Evropian. Gjatë operacionit u arrestuan 14 të dyshuar në të dy vendet.
Puna e SPAK-ut në vitet e fundit është mbështetur dhe përshëndetur nga Shtetet e Bashkuara të Amerikës dhe Bashkimi Evropian.