Operacioni policor po zhvillohet në kuadër të luftimit të krimit të organizuar dhe ka për qëllim goditjen e rrjeteve të dyshuara për trafikim ndërkombëtar të substancave narkotike. Hetimet fokusohen në veprat penale si "pjesëmarrja ose organizimi i grupit kriminal të organizuar", "blerja, posedimi, shpërndarja dhe shitja e paautorizuar e narkotikëve", si dhe "pastrimi i parave".
Në mbështetje të këtij aksioni, përveç organeve ligjzbatuese vendore, janë angazhuar përfaqësues nga EUROPOL-i dhe autoritetet ligjzbatuese të Belgjikës, Francës dhe Holandës. Sipas informacioneve, një nga lokacionet e operacionit është zona e Rrugës B në Prishtinë, ndërsa raportimet e medias identifikojnë shtetasin B. Islami si një nga të dyshuarit e përfshirë në këtë hetim.
Autoritetet kanë njoftuar se operacioni është duke vijuar. Pas përfundimit të procedurave në terren, Prokuroria Speciale dhe Policia e Kosovës pritet të njoftojnë publikun mbi rezultatet konkrete përmes një komunikate të përbashkët.