Një delegacion i Forcës së Sigurisë së Kosovës (FSK), i përbërë nga përfaqësues të Gardës Kombëtare dhe Komandës së Logjistikës, zhvilloi një vizitë zyrtare në Komandën Mbështetëse të Forcave të Armatosura të Republikës së Shqipërisë (FARSH). Ky aktivitet u realizua në kuadër të bashkëpunimit të vazhdueshëm ushtarak ndërmjet dy vendeve.
Delegacioni i FSK-së u kryesua nga zëvendëskomandanti i Komandës së Logjistikës, kolonel Valdet Berisha. Ai u prit në takim nga komandanti i Komandës Mbështetëse të FARSH-it, gjeneral brigade Aleksandër Pando, së bashku me stafin e tij.
Gjatë takimeve profesionale, palët u fokusuan në tri shtylla kryesore të bashkëpunimit:
• Logjistika ushtarake
• Trajnimet e përbashkëta
• Menaxhimi i emergjencave civile
Gjatë vizitës, përfaqësuesit e FSK-së u njohën nga afër me misionin, strukturën organizative dhe kapacitetet e Komandës Mbështetëse. Po ashtu, delegacioni vizitoi kapacitetet logjistike dhe ato të emergjencave civile, duke u informuar mbi organizimin, pajisjet dhe procedurat që përdoren në operacionet ushtarake dhe në menaxhimin e situatave emergjente.
Palët shkëmbyen përvoja profesionale dhe diskutuan mundësitë për zgjerimin e bashkëpunimit në fushat me interes të përbashkët, me synim rritjen e ndërveprueshmërisë dhe forcimin e marrëdhënieve ndërmjet FSK-së dhe FARSH-it.