Moti i përkeqësuar në pasditen e 23 marsit ka sjellë reshje të dendura të breshërit në luginën e Vjosës, duke shkaktuar dëme të konsiderueshme në sektorin bujqësor.
Stuhia e fortë dhe e papritur ka goditur drejtpërdrejt sipërfaqe të mbjella, veçanërisht në fshatrat Adë, Cakran dhe Vreshtas.
Dëmet më të mëdha janë evidentuar në pemëtari dhe vreshtari, ku breshëri ka dëmtuar lulet e pemëve, ka rrëzuar lulëzimet dhe, në disa raste, lastarët e degëve të pemëve dhe hardhive.
Këto pasoja rrezikojnë një pjesë të konsiderueshme të prodhimit sezonal dhe mund të ndikojnë edhe në prodhimin e viteve të ardhshme.
Banorët e zonës shprehin shqetësim për shpeshtësinë në rritje të këtyre fenomeneve, të cilat rëndojnë ekonominë lokale të bazuar kryesisht në bujqësi.