Misioni vendor për vëzhgimin e zgjedhjeve, Demokracia në Veprim (DnV), prezantoi rezultatet preliminare të procesit zgjedhor të zhvilluar më 7 qershor. Sipas vlerësimeve, të cilat reflektojnë 75% të mostrës, Lëvizja Vetëvendosje prin në garë.
Sipas Ismet Kryeziut nga DnV, këto shifra nuk përfshijnë votat me kusht dhe ato të diasporës. Pjesëmarrja e qytetarëve në votime ishte 37%, duke shënuar një rënie në krahasim me proceset e mëparshme: zgjedhjet e 28 dhjetorit 2025 (45%), ato të 9 shkurtit (44.1%) dhe zgjedhjet e vitit 2021 (48.78%).
Procesi zgjedhor është vlerësuar si i qetë dhe i rregullt, pavarësisht vështirësive teknike që raportuan votuesit për gjetjen e qendrave të sakta të votimit, një çështje për të cilën KQZ kishte ofruar informacione dy muaj para zgjedhjeve. DnV njoftoi gjithashtu se gjatë këtij procesi është vërejtur një rënie e ndjeshme e rasteve të votimit me asistencë krahasuar me zgjedhjet e mëparshme. Institucionet përkatëse, përfshirë Komisionin Qendror të Zgjedhjeve (KQZ), janë vlerësuar për administrimin e procesit, pavarësisht afateve të shkurtra për organizim.
Përditësime
Demokracia në Veprim (DnV) ka publikuar rezultatet preliminare, ku Srpska Lista renditet me 6.4% të votave. Analiza përfshin marzhin e gabimit për subjektet kryesore si vijon: LVV (1.7%), PDK (1.6%), LDK (1.1%) dhe AAK (1.1%). DnV u ka bërë thirrje subjekteve politike që të përmbahen nga festimet deri në shpalljen e rezultateve zyrtare nga Komisioni Qendror i Zgjedhjeve (KQZ).