Autoritetet policore kanë njoftuar se kanë nisur hetimet lidhur me dëmtimet e konstatuara në Kompleksin Memorial Zahir Pajaziti, në fshatin Orllan të komunës së Podujevës.
Sipas raportit zyrtar, dëmtimet janë vërejtur në objektin përcjellës të kullës, konkretisht në tavan dhe në korridorin e ndërtesës. Hetimet sugjerojnë se këto dëmtime kanë ndodhur përgjatë periudhës kohore nga 30 maji deri më 30 qershor 2026.
Lidhur me këtë rast është njoftuar prokurori i shtetit, ndërsa njësitet policore po vazhdojnë procedurat hetimore për zbardhjen e rrethanave. Rasti është klasifikuar si vepër penale nën dyshimin për “Asgjësim apo dëmtim i pasurisë së huaj”.
Përditësime
Drejtori i Agjencisë për Menaxhimin e Komplekseve Memoriale (AMKM), Imer Hakaj, ka konfirmuar dëmtimet në Kompleksin Memorial "Zahir Pajaziti" në Orllan. Hakaj bëri të ditur se kompleksi aktualisht nuk ka shërbim roje apo ciceron, ndërsa theksoi se AMKM ka hartuar tashmë një projekt për ndërhyrje restauruese.
Kryetari i OVL UÇK-së në Podujevë, Rafet Llapashtica, ka denoncuar dëmtimin e Kompleksit Memorial Zahir Pajaziti në Orllan, duke e cilësuar atë si akt të qëllimshëm të elementeve keqdashëse. Llapashtica theksoi se kompleksi është lënë pa mbikëqyrje dhe mirëmbajtje që nga prilli i vitit 2026. Organet e rendit po e trajtojnë rastin si sulm të përsëritur, pas incidentit të ngjashëm ndaj lapidarit në Qafë të Kaçanollit.