Agjencia për Menaxhimin e Monumenteve dhe Komplekseve Memoriale (AMMKM) ka njoftuar se ka ndërmarrë hapa ligjorë pas evidentimit të dëmtimeve në Kompleksin Memorial “Kulla e Zahir Pajazitit” në Orllan të Podujevës. Drejtori Ekzekutiv i institucionit ka kërkuar zyrtarisht nga Policia e Kosovës nisjen e hetimeve, duke u bazuar në dispozitat e Kodit Penal të Republikës së Kosovës, të cilat e klasifikojnë dëmtimin ose shkatërrimin e monumenteve si vepër penale.
Kërkesa për inicimin e hetimeve është dorëzuar më 6 korrik 2026 në Drejtorinë Rajonale të Policisë në Prishtinë dhe në Stacionin Policor në Podujevë.
Aktualisht, AMMKM është duke realizuar projektin “Intervenime Emergjente në Komplekse dhe Memoriale, Varreza të Dëshmorëve dhe Martirëve – Kosovë – Intervenime Emergjente në KM ‘Kulla e Zahir Pajazitit’, Orllan – Podujevë”, me numër të kontratës 207/27900-25-9937-5-2-1/C97. Ky projekt synon ruajtjen dhe përmirësimin e gjendjes së kompleksit.
Po ashtu, Agjencia menaxhon kompleksin në bazë të një kontrate kornizë për mirëmbajtje (nr. 207-AMMKM-25-6581-2-1-1/C86), e cila ka hyrë në fuqi më 28 gusht 2025 dhe është e vlefshme deri më 28 gusht 2028.
Në bashkëpunim me institucionet kompetente, AMMKM do të shqyrtojë të gjitha mundësitë për sanimin e dëmeve të shkaktuara. Publiku do të njoftohet për rezultatet pas përfundimit të hetimeve nga organet e rendit.