Zbulohen mbetjet mortore të 23 personave në Zubin Potok

Gjatë gërmimeve të zhvilluara në komunën e Zubin Potokut, janë gjetur mbetje mortore që dyshohet se u përkasin 23 viktimave të luftës së fundit në Kosovë. Sipas Agron Limanit, kryesues i Komisionit Qeveritar për Personat e Zhdukur, kërkimet ishin zhvilluar më parë pa sukses, por informacionet e besueshme të siguruara së fundmi mundësuan identifikimin e tri lokacioneve: dy në Kalludër dhe një në Jabukë.

Në lokacionin e parë u gjetën mbetjet e 13 personave, në të dytin të gjashtë personave, ndërsa në të tretin të shtatë personave. Këto mbetje përkojnë me "Grupin e Intelektualëve të Mitrovicës", të cilët ishin zhdukur në prill të vitit 1999.

Procesi i identifikimit po udhëhiqet nga Instituti i Mjekësisë Ligjore (IML). Dion Haliti nga IML bëri të ditur se mostrat kockore kanë filluar të dërgohen në Komisionin Ndërkombëtar për Persona të Zhdukur në Hagë për analizat gjenetike. Pas identifikimit, do të kryhen autopsi për të përcaktuar dëmtimet në eshtra, shkakun dhe mënyrën e vdekjes. Gjetjet do t’i përcillen Prokurorisë së Shtetit për procedurat e mëtejshme penale. Nëse nxjerrja e profilit të ADN-së nuk has në pengesa, procesi pritet të zgjasë rreth tre muaj.

Baki Svirca, udhëheqës i Divizionit për Drejtësi Tranzicionale në Ministrinë e Drejtësisë, theksoi rëndësinë e këtyre gjetjeve për dokumentimin e krimeve të luftës. Ai vuri në dukje se sigurimi i provave është thelbësor, duke shtuar se procesi i zbardhjes së fatit të të zhdukurve po vështirësohet nga shantazhet dhe kërcënimet që, sipas tij, po ushtrohen ndaj personave që mund të kenë informacione për rastet.