Ambasadori i Shqipërisë në Maqedoninë e Veriut, Denion Meidani, pritet të përfundojë para kohe mandatin e tij diplomatik në Shkup. Burime pranë Ministrisë për Evropën dhe Punët e Jashtme dhe burime diplomatike në Shkup tregojnë se vendimi mund të formalizohet në ditët e ardhshme.
Raportet mediatike lidhin këtë lëvizje me qëndrimet publike të Meidanit në mbështetje të studentëve shqiptarë që protestojnë për të drejtën e provimeve të jurisprudencës në gjuhën shqipe. Ankesat kanë ardhur nga partia qeverisëse VMRO-DPMNE dhe koalicioni shqiptar VLEN.
Sipas disa burimeve, emri i Petrit Malajt, ambasadorit aktual të Shqipërisë në Kosovë, përmendet si mundësi për t’u emëruar në Shkup. Megjithatë, Ministria e Punëve të Jashtme ka hedhur poshtë këto pretendime.
Zëdhënësi i ministrisë, Alteo Hysi, ka deklaruar se lëvizjet diplomatike bëhen sipas legjislacionit në fuqi dhe analizave profesionale, ndërsa komentet mediatike nuk pasqyrojnë realitetin.
Pas publikimit të lajmeve, intelektualë shqiptarë në Maqedoninë e Veriut kanë nisur një peticion për moslargimin e Meidanit, duke mbledhur mbi 3100 firma që i janë drejtuar kryeministrit Edi Rama dhe ministrit Ferit Hoxha.
Përditësime
Maqedonia e Veriut thirri ambasadorin shqiptar. Ministria e Punëve të Jashtme i dorëzoi një demarsh verbal zyrtar për ndërhyrje në punët e brendshme. Pala shqiptare ngriti shqetësim për trajtimin e rreth 40 studentëve në autobusin nga Tirana.