Ministria për Evropën dhe Punët e Jashtme reagoi ndaj akuzave të opozitës për mosreagim gjatë protestës së studentëve shqiptarë në Shkup. Në një deklaratë për shtyp, Ministria i quan të pavërteta dhe të padrejta këto pretendime.
Ministria shpjegon se Ambasada e Shqipërisë në Shkup ka qenë në kontakt të vazhdueshëm me studentët dhe me zhvillimet në terren. Sekretari i Përgjithshëm i MEPJ-së, i cili ndodhej në Shkup, është takuar personalisht me studentët për të dëgjuar shqetësimet dhe kërkesat e tyre.
Ministri për Evropën dhe Punët e Jashtme, Ferit Hoxha, ka reaguar publikisht në mbështetje të studentëve dhe të drejtës së tyre për përdorimin e gjuhës shqipe. Ai ka theksuar se përdorimi i gjuhës amtare është një e drejtë themelore e garantuar nga Kushtetuta e Maqedonisë së Veriut dhe Ligji për Përdorimin e Gjuhëve.
MEPJ shton se diplomacia ka kodet dhe mekanizmat e saj të komunikimit dhe se jo çdo angazhim institucional bëhet publik në kohë reale ose në rrjetet sociale. Ministri Hoxha ka vlerësuar gjithashtu qëndrimin e studentëve për angazhimin qytetar dhe mënyrën demokratike të artikulimit të kërkesave.