Gjykata Themelore në Pejë ka shpallur fajtore Aurona Pelajn për veprën penale të sulmit ndaj një gruaje të moshuar, e cila ishte nën përkujdesjen e saj në një qendër kujdesi në Pejë. Ngjarja ka ndodhur në vitin 2022, ndërsa vendimi është dhënë nga gjyqtari Alan Taranis.
Sipas vendimit, e pandehura ka shfrytëzuar pozitën e saj si infermiere dhe gjendjen e pambrojtur të viktimës, e cila vuan nga sëmundja e Alzheimerit. Ajo e ka kapur viktimën nga duart, ia ka kufizuar mundësinë e mbrojtjes, e ka mbështetur për muri dhe e ka goditur disa herë me shuplaka në fytyrë.
Në dënimin prej 2 vjetësh e 3 muajsh burgim, gjykata ka llogaritur edhe periudhën e qëndrimit në paraburgim, nga data 2 nëntor deri më 24 nëntor 2022. Pjesa e mbetur e dënimit do të ekzekutohet pas marrjes së formës së prerë të këtij aktgjykimi. Po ashtu, për të pandehurën është vendosur masa plotësuese e ndalimit të ushtrimit të profesionit të infermieres për një afat prej 5 vjetësh, që fillon pas përfundimit të dënimit.
Në lidhje me të njëjtin rast, gjykata ka marrë vendim për lirimin e dy të akuzuarave të tjera që ishin përfshirë në proces për bashkëveprim. Seanca për shpalljen e aktgjykimit është zhvilluar në mungesë të të akuzuarave.