Ferzidin Boza nga fshati Restelicë i Komunës së Dragashit, i dyshuar për vrasjen e nënës së tij në orët e para të ditës së sotme, kishte tri aktgjykime penale të mëparshme në Gjykatën Themelore në Prizren, Dega në Dragash. Gjykata bëri të ditur detajet e këtyre rasteve, ku dy prej tyre përfshinin masa trajtimi të detyrueshëm psikiatrik në liri, të zbatuara nga Qendra për Shëndet Mendor në Prizren.
Rastet penale janë si vijon:
• 15 korrik 2022 (P.nr. 2/22): Shpallur fajtor për lëndim të lehtë trupor. Dënim me 6 muaj burgim, i pezulluar për periudhë verifikuese 2 vjeçare. Masë trajtimi psikiatrik ambulator në liri për 2 vjet, me raportime çdo 6 muaj nga Qendra për Shëndet Mendor në Prizren.
• 22 gusht 2022 (P.nr. 56/21): Shpallur fajtor për dhunë në familje. Dënim me 6 muaj burgim, i pezulluar për periudhë verifikuese 1 vjeçare. Masë trajtimi psikiatrik në liri deri në përmirësim, por jo më shumë se 3 vjet, me raportime periodike nga Qendra për Shëndet Mendor në Prizren.
• 17 tetor 2024 (P.nr. 65/24): Shpallur fajtor për lëndim të lehtë trupor. Dënim fillestar me 6 muaj burgim, duke llogaritur kohën në paraburgim nga 30 qershor 2024 deri më 25 shtator 2024. Me pëlqimin e të akuzuarit dhe mbrojtjes, zëvendësuar me gjobë prej 2.000 euro, nga e cila zbriti shuma për paraburgimin, duke mbetur 260 euro për t'u paguar pas plotfuqishmërisë së aktgjykimit.
Gjykata njoftoi se institucionet përkatëse, si Shërbimi Sprovues dhe Qendra për Punë Sociale në Dragash, ishin informuar për masat. Boza kishte probleme mendore dhe ishte paralajmëruar për zëvendësimin e dënimeve me kusht në burgim efektiv në rast përsëritjeje.