Gjykata Themelore në Gjakovë, nën drejtimin e gjyqtares Blerina Kurtaj, ka dhënë aktgjykimin ndaj M.D., i cili u shpall fajtor për ushtrimin e dhunës ndaj nënës së tij, R.D., në fshatin Novosellë e Epërme. I pandehuri akuzohej për tri vepra penale: “Dhuna në familje”, “Mospërfillja e gjykatës” dhe “Lëndimi i lehtë trupor”, pasi kishte shkelur urdhrin për mbrojtje të caktuar më herët.
Ngjarja kishte kulmuar më 17 shkurt 2026, kur pas një mosmarrëveshjeje për ushqimin, M.D. e kishte goditur fizikisht të ëmën me shuplaka dhe e kishte shtyrë. Si pasojë, viktima ishte rrëzuar mbi një tavolinë dhe kishte lënduar dorën e majtë. Sipas dëshmive të paraqitura në gjykatë, kur e dëmtuara kishte kërkuar ndihmë për t’u ngritur, i pandehuri e kishte goditur me shkelm në trup. Më pas, ai e kishte kanosur të ëmën me një hekur që përdoret për ndezjen e prushit, duke i thënë: “Të ka ardhur momenti i fundit”.
Gjykata konstatoi se i pandehuri kishte shfaqur sjellje të dhunshme edhe më herët, përfshirë ofendimin e nënës dhe shkatërrimin e ushqimeve, çka e kishte detyruar viktimën të kërkonte ndihmën e Policisë. Si pasojë e këtyre veprimeve, viktima pësoi lëndime të lehta trupore me pasoja të përkohshme për shëndetin.
Palët e përfshira në këtë proces gjyqësor kanë të drejtë të paraqesin ankesë kundër këtij aktgjykimi brenda afatit ligjor prej 30 ditësh nga dita e pranimit të vendimit në formë të shkruar.
Përditësime
Gjykata Themelore në Gjakovë e dënoi të pandehurin M.D. me 1 vit e 3 muaj burgim dhe 500 euro gjobë për dhunë në familje. Trupi gjykues vendosi që në këtë dënim të llogaritet koha e kaluar në paraburgim që nga 17 shkurti 2026. Vendimi u bazua edhe në faktin se i pandehuri kishte shkelur urdhrin për mbrojtje që ishte në fuqi në momentin e kryerjes së veprave penale.