Deputeti i Bundestagut gjerman, Peter Beyer, i është drejtuar me një mesazh Kuvendit Kombëtar të Partisë Demokratike, duke vlerësuar procesin e vendimmarrjes për zgjedhjen e drejtuesve të rinj. Ndonëse mungoi fizikisht për shkak të angazhimeve të tjera, Beyer shprehu mbështetjen e tij për delegatët dhe theksoi rëndësinë e këtij momenti për të ardhmen e forcës më të madhe opozitare.
Në fjalën e tij, përfaqësuesi i CDU/CSU nënvizoi se Shqipëria përballet me sfida të rëndësishme në rrugën drejt Bashkimit Europian. Ai kërkoi nga opozita që të mbajë nën vëzhgim përfaqësuesit e qeverisë shqiptare në samitin e ardhshëm mes Bashkimit Europian dhe Ballkanit Perëndimor, që do të mbahet në Mal të Zi.
Beyer kërkoi gjithashtu forcimin e luftës kundër krimit të organizuar dhe korrupsionit, duke nënvizuar se pritshmëritë e Gjermanisë dhe partnerëve europianë ndaj Partisë Demokratike mbeten të larta. Ai theksoi domosdoshmërinë që opozita të shmangë konfliktet e brendshme dhe të përqendrohet te ndërtimi i një alternative politike, e cila do të udhëheqë vendin drejt një të ardhmeje më të qëndrueshme dhe më të begatë.