Sekretarja e Përgjithshme e PPE-së, Dolors Montserrat, përcolli një mesazh mbështetjeje për Partinë Demokratike gjatë punimeve të Kuvendit Kombëtar të kësaj force politike. Në video-mesazhin e saj, Montserrat vlerësoi procesin e modernizimit të PD-së, duke e cilësuar atë si një hap kyç për të rritur kapacitetet e partisë për fitoren në zgjedhjet e ardhshme.
Sipas përfaqësueses së PPE-së, rikthimi i PD-së në pushtet shihet si një mjet për konsolidimin e demokracisë në vend. Montserrat theksoi se Shqipëria duhet të ndërmarrë hapa konkretë për forcimin e shtetit të së drejtës, luftën kundër krimit të organizuar, trafikimit të narkotikëve dhe korrupsionit.
Në mesazhin e saj, ajo siguroi se familja e PPE-së, së bashku me kreun e saj Manfred Weber, qëndron në krah të Sali Berishës dhe të gjithë ekipit demokrat. Sipas Montserrat, ky bashkëpunim synon rikthimin e besimit të qytetarëve te institucionet dhe përshpejtimin e rrugëtimit të Shqipërisë drejt Bashkimit Europian.