Deputeti i Lëvizjes Vetëvendosje (LVV), Driton Hyseni, ka shprehur optimizëm se brenda afatit kushtetues mund të gjendet një zgjidhje për zgjedhjen e presidentit të Kosovës.
Ai deklaroi se takimet aktuale synojnë gjetjen e një gjuhe të përbashkët mes subjekteve politike për daljen nga kriza sa i përket kësaj çështjeje. Hyseni theksoi se janë në rrugë të mbarë dhe do të shterohen të gjitha mundësitë.
"Unë mendoj se takimet kanë këtë synim, të gjejmë një gjuhë të përbashkët dhe të dalim nga kriza e cila na ka përcjellë gjatë javëve të kaluara sa i përket çështjes së presidentit. Unë mendoj se jemi në rrugë të mbarë dhe do t’i shterojmë të gjitha mundësitë. Tani kemi kohën përpara, janë edhe shumë ditë në dispozicion dhe unë mendoj se secili nga akterët politikë duhet ta bëjë maksimumin e vet që të vijmë te një zgjidhje sa i përket kreut të shtetit dhe të evitohen zgjedhjet, të cilat nuk janë të dëshirueshme për askënd", tha Hyseni për RTV21 më 13 prill 2026.