Deputetja e zgjedhur e LDK-së, Janina Ymeri, ka reaguar ndaj kushteve të vështira në Klinikën e Pediatrisë pranë Qendrës Klinike Universitare të Kosovës (QKUK). Ky reagim vjen pas publikimit të fotografive nga një qytetare në rrjetet sociale, të cilat dëshmojnë mungesën e çarçafëve dhe shtretërve të rregullt për fëmijët pacientë.
Nëpërmjet një postimi në Facebook, Ymeri ka akuzuar qeverinë për korrupsion dhe menaxhim katastrofal të institucioneve. Ajo ka vënë theksin te kontrasti midis gjendjes në spitale dhe paraqitjes publike të zyrtarëve, duke drejtuar akuza të drejtpërdrejta ndaj ministrit të Shëndetësisë, Arben Vitia.
"Spitalet pa çarçafë e pa kurrfarë shtrati, Vitia si ministër me mindil mëndafshi. Ftoj ministrin të krahasojë pak shtratin e fëmijëve edhe mindilin e katit. Në fund të dyja paguhen me para nga ne të ngratit", ka shkruar Ymeri.
Deputetja ka ngritur dyshime mbi mënyrën e shpenzimit të parave të taksapaguesve, duke kërkuar përgjigje se pse nuk po ndërrohen çarçafët për fëmijët, ndërsa veshjet e ministrave, sipas saj, "po vezullojnë" gjithmonë e më shumë.