Didier Deschamps, trajneri i kombëtares së Francës, ka mbrojtur Kylian Mbappé gjatë një konference në Festivalin e Gazetarisë Sportive në Laval, ku u pyet për akuzat e egoizmit dhe angazhimit fizik të ulët të sulmuesit.
Deschamps hodhi poshtë pretendimet se Mbappé nuk vrapon sa të tjerët, duke thënë me humor se edhe portieri ndodhet në të njëjtën situatë. Ai shtoi: “Nëse doni që ai të vrapojë të paktën 11 kilometra për ndeshje, mos u mundoni, nuk do ta bëjë”. Asistenti i tij, Guy Stéphan, nënvizoi se Mbappé kryen vrapime me intensitet të lartë.
Trajneri theksoi se imazhi i Mbappé si egoist nuk përputhet me realitetin brenda ekipit. “Kylian, pavarësisht nëse ju pëlqen apo jo, lojtarët e rinj e adhurojnë. Është e vërtetë që një sulmues duhet të jetë egoist, por brenda kombëtares franceze ai sillet si kapiten”, deklaroi Deschamps.
Mbappé, sulmuesi i Real Madridit, po kalon një formë të lartë dhe shihet si lider për Les Bleus. Synimi i ardhshëm është Kupa e Botës 2026 në SHBA, Kanada dhe Meksikë, ku Franca pret kontribut vendimtar nga ai.