Procesi gjyqësor për ndarjen nga jeta të legjendës së futbollit Diego Maradona ka marrë një kthesë të re pas dëshmisë së mjekut ekspert Pablo Ferrari. Gjatë seancës së fundit në San Isidro, Ferrari ngriti hipotezën se infeksioni nga COVID-19 nuk mund të përjashtohet si shkaktar i vdekjes, duke e cilësuar moskryerjen e një tamponi gjatë autopsisë si një mangësi metodologjike thelbësore.
Maradona, i cili ndërroi jetë më 25 nëntor 2020 në moshën 60-vjeçare, kishte pësuar një arrest kardiak pak javë pas një ndërhyrjeje kirurgjikale për hematomë subdurale. Ferrari shpjegoi se virusi mund të shkaktojë edemë akute pulmonare dhe komplikacione fatale në një kohë shumë të shkurtër, duke hedhur poshtë dëshmitë e mëparshme se ish-futbollisti kishte pasur një agoni të zgjatur prej 12 orësh. Sipas tij, vdekja ka qenë e shpejtë, duke zgjatur nga disa minuta deri në pak orë.
Kjo dëshmi përputhet me vijën mbrojtëse të mjekut kryesor Leopoldo Luque, i cili së bashku me gjashtë profesionistë të tjerë shëndetësorë – Agustina Cosachov, Nancy Forlini, Carlos Diaz, Mariano Perroni, Ricardo Almiron dhe Pedro Di Spagna – akuzohen për vrasje të thjeshtë me dashje eventuale. Ndërsa Ferrari është i vetmi ekspert zyrtar që mbështet këtë interpretim, pritet që ky element të ndikojë në zhvillimet e ardhshme të gjyqit.
Procesi, i cili ka mbledhur deri tani dëshmitë e 76 personave gjatë 43 seancave, do të vazhdojë më 29 shtator, kur të pandehurit do të paraqesin mbrojtjen e tyre. Argumentet përfundimtare janë planifikuar të fillojnë më 6 tetor, datë pas së cilës pritet edhe shpallja e vendimit të gjykatës.