Ngjarja nisi më 6 janar 2021, kur autoritetet u njoftuan për një automjet të shkrumbuar në afërsi të një gremine në Pukë. Brenda mjetit u gjetën mbetje kockore, çka çoi në hapjen e hetimeve për vrasje nga autoritetet shqiptare dhe italiane. Oficeri i dosjes, Fatbardh Kuliçi, deklaroi se ekspertët konstatuan se mbetjet ishin hedhur në mënyrë të çrregullt dhe nuk i përkisnin një të rrituri në moshën e Pecorellit, duke hedhur poshtë skenarin e një djegieje të kufomës brenda mjetit.
Davide Pecorelli, një ish-arbitër futbolli dhe sipërmarrës, pranoi se kishte planifikuar gjithçka për shkak të gjendjes së rënduar psikologjike dhe ekonomike. Ai deklaroi se falimenti prej disa milionë eurosh, i shkaktuar nga pandemia, e çoi në depresion. Më 3 janar 2021, ai mbërriti në Rinas, mori një makinë me qira dhe udhëtoi në disa qytete të veriut, përfshirë Shkodrën dhe Kukësin, përpara se të vendosej në hotelin Turizmi në Pukë, ku qëndroi në dhomën 204.
Sipas rindërtimit të lëvizjeve nga sistemi GPS dhe kamerat e sigurisë, italiani kishte udhëtuar i vetëm në zona si Vlorë, Vaun e Dejës, Mjedë dhe Bushat. Një takim i vetëm është identifikuar në zonën e Shirokës, ku ai është shfaqur duke biseduar me një person tjetër. Pecorelli pretendoi se në atë periudhë kishte vendosur t'i jepte fund jetës dhe se kishte zhvilluar një takim me një prift nga Shkodra, identitetin e të cilit ka refuzuar ta zbulojë edhe para organeve të drejtësisë.
Pas inskenimit, ndërsa hetuesit kërkonin autorët e vrasjes, Pecorelli u shfaq gjallë rreth 9 muaj më vonë në afërsi të ishullit Montecristo, duke marrë në media epitetin "I mbijetuari i Montecristos". Aktualisht, rasti vazhdon të jetë objekt i vëmendjes për shkak të mënyrës së organizuar të këtij veprimi dhe përfshirjes së elementeve të paqarta në rrëfimin e shtetasit italian.