Shefi i stacionit policor të Roskovecit, Mariglen Koroveshaj, ka ndarë detaje mbi ngjarjen e rëndë të ndodhur në Vidhish të Roskovecit, ku autori Refit Buzi vrau dy persona dhe mori peng ish-partneren e tij, Rozalinda Plaka. Sipas Koroveshajt, operacioni i shpëtimit ka qenë momenti më i vështirë në karrierën e tij 12-vjeçare, për shkak të rrezikut të lartë dhe gjendjes së tensionuar të autorit.
Pas vrasjes së Kosta Plakës (58 vjeç) dhe plagosjes së Belere Plakës (55 vjeçe), e cila ndërroi jetë më vonë në spital, Refit Buzi u lokalizua nga policia në fshatin Kurjan. Forcat speciale RENEA rrethuan automjetin ku ndodhej autori bashkë me pengun. Koroveshaj tregon se negociatat zgjatën rreth dy orë, periudhë gjatë së cilës autori kërkoi që vetëm shefi i stacionit policor t'i afrohej automjetit, pa armë dhe i vetëm.
"Gjatë negociatave, autori refuzonte ta lironte vajzën, pasi e konsideronte atë si garanci për sigurinë e tij. Kur u afrova në një distancë prej rreth 2 metrash, ai më kërkoi të mos lëvizja, përndryshe do të vriste veten," u shpreh Koroveshaj. Pasi arriti ta bindte autorin të lironte vajzën, polici ndërhyri për ta nxjerrë atë nga automjeti. Ai vuri në dukje se Rozalinda Plaka ishte në gjendje të rëndë psikologjike dhe kishte dëmtime fizike të dukshme, të shkaktuara nga dhuna gjatë rrëmbimit, çka e bënte të pamundur që ajo të lëvizte vetë. Për këtë arsye, ai e mori vajzën në krahë për ta larguar nga zona e rrezikut.
Pas largimit të viktimës, Koroveshaj u kthye sërish për të vazhduar negociatat me Refit Buzin, me qëllim që ta bindte atë të dorëzonte armën e gjahut dhe t'i jepte fund situatës. Autoritetet theksuan se çdo sekondë ishte vendimtare dhe se të gjitha veprimet janë kryer për të shmangur përshkallëzimin e mëtejshëm të ngjarjes dhe për të garantuar jetën e pengut dhe të vetë autorit.