Dhomat e Specializuara të Kosovës kanë publikuar për herë të parë pamje nga Qendra e Paraburgimit në Hagë, ku mbahen Hashim Thaçi dhe ish-krerët e tjerë të UÇK-së.
Sipas njoftimit zyrtar, të pandehurit e paraburgosur para ose gjatë gjyqeve në këtë institucion gëzojnë kushte të caktuara. Ata kanë qasje në ajër të pastër dhe ushtrime fizike, mund të shoqërohen me të tjerët, të presin vizitorë dhe të marrin pjesë në shërbesa fetare.
Pamjet e publikuara paraqesin hapësira specifike:
- Hapësirë për fitnes dhe ushtrime;
- Këndi i qëndrimit ditor për socializim;
- Dhoma e dedikuar për takime me familjarët.
Paraburgimi zbatohet vetëm kur është e nevojshme për të parandaluar rreziqe të konsiderueshme, si përpjekja për të frikësuar ose ndikuar në dëshmitarë. Çdo dy muaj, gjyqtarët e Gjyqit të Specializuar të Kosovës rishikojnë masën për të vlerësuar nëse ajo mbetet e nevojshme dhe e arsyeshme.
Njoftimi është postuar me një video në llogarinë zyrtare të institucionit në platformën X, për të ofruar transparencë mbi kushtet e paraburgimit.