Akademiku Arsim Bajrami ka bërë të ditur se kryetarja e Dhomave të Specializuara të Kosovës, Ekaterina Trendafilova, kishte paralajmëruar dorëheqjen e saj në rast se paraburgimi i ish-krerëve të UÇK-së do të tejkalonte periudhën prej një viti. Sipas Bajramit, kjo deklaratë është bërë jo vetëm në biseda private, por edhe publikisht nga vetë kryetarja e gjykatës.
Duke folur në emisionin Info Magazine në Klan Kosova, Bajrami argumentoi se mbajtja e të akuzuarve për një kohë kaq të gjatë në paraburgim nuk mbështetet në arsye ligjore. Ai nënvizoi se Kosova është shembull pozitiv i bashkëpunimit me Gjykatën Speciale, duke rikujtuar se të gjithë të akuzuarit ishin dorëzuar vullnetarisht.
"Ne e dimë se edhe vetë përfaqësuesit e gjykatës, filluar nga kryetarja zonja Trendafilova, na patën premtuar qysh në vitin e parë se nëse këta mbahen më shumë se një vit në paraburgim, ajo është e gatshme të japë dorëheqje", u shpreh akademiku. Ai kritikoi vazhdimin e këtyre masave shtrënguese dhe gjetjen e vazhdueshme të arsyeve nga ana e Gjykatës Speciale për të zgjatur paraburgimin dhe për të vendosur kufizime ndaj të akuzuarve, duke e krahasuar këtë praktikë me qasjen ndaj rasteve të tjera rajonale.