Akademiku Arsim Bajrami ka shprehur pritshmërinë që ish-krerët e UÇK-së, të cilët po gjykohen para Dhomave të Specializuara në Hagë, të lirohen nga akuzat që rëndojnë mbi ta. Në një intervistë për emisionin “Info Magazine” në Klan Kosova, Bajrami ka adresuar çështjen e shkeljeve të pretenduara gjatë procesit gjyqësor.
Ai theksoi se këto shkelje, për të cilat ka shkruar në mënyrë të përsëritur, mund të falen nga pala kosovare vetëm nëse Gjykata Speciale sjell një aktgjykim lirues më 16 shtator. Sipas Bajramit, ky veprim do të ishte thelbësor për t’u konsideruar si ndarje e drejtësisë.
“Uroj që krejt këto shkelje që kemi diskutuar, unë mandej kam shkruar shumë, t’ia falim kësaj gjykate vetëm me një kusht – ta bie një aktgjykim të lirues, t’i lejojë njerëzit të kthehen në shtëpitë e veta, të kthehen në shtetin e vet dhe të vazhdojnë të kontribuojnë në procesin e drejtimit. Nëse ndodh kjo, atëherë do të mund të themi se kanë ndarë drejtësi”, u shpreh ai.