Gjykata Speciale në Hagë është duke shqyrtuar kërkesën e ekipit mbrojtës të Hashim Thaçit për ndryshimin e masës së sigurisë, pas parashtresës së dorëzuar më 6 korrik 2026. Kërkesa përfshin një pako masash shtrënguese dhe garanci financiare prej 50 mijë eurosh.
Sipas dokumentacionit të mbrojtjes, ish-presidenti është zotuar për respektimin e një sërë kushtesh, të cilat përfshijnë:
• Ndalimin e largimit nga territori i Kosovës;
• Dorëzimin e pasaportës dhe dokumenteve të tjera të udhëtimit;
• Ndalimin e çdo deklarate publike, drejtpërdrejt ose tërthorazi, në media apo rrjete sociale;
• Mospjesëmarrjen në diskutime rreth çështjes gjyqësore me persona të tjerë përveç anëtarëve të caktuar të ekipit mbrojtës.
Zëdhënësi i Gjykatës, Michael Doyle, deklaroi se gjykatësi i vetëm do të marrë një vendim të arsyetuar në kohën e duhur, në përputhje me ligjin dhe rregulloret e institucionit. Aktualisht, nuk është përcaktuar një datë specifike për shpalljen e këtij vendimi.