Mbrojtja e ish-presidentit të Kosovës, Hashim Thaçi, i ka paraqitur gjykatës kërkesë për lirim të përkohshëm nga paraburgimi, duke propozuar si garanci një shumë prej 50 mijë eurosh. Megjithatë, kjo kërkesë nuk është mbështetur nga Zyra e Prokurorit të Specializuar (ZPS).
Kryeprokurorja Kimberly West ka theksuar se procesi gjyqësor po shënon përparim të vazhdueshëm, gjë që kërkon që i akuzuari të mbetet në paraburgim. Në shkresën e saj, West sqaroi se afatet kohore për mocionet përfundimtare lidhur me provat kërkojnë praninë e pandërprerë të të akuzuarit.
Sipas ZPS-së, konstatimet e mëparshme mbi ekzistencën e rreziqeve sipas nenit 41(6)(b) mbeten ende të vlefshme. Në dokumentin e prokurorisë thuhet se këto rreziqe, të cilat përfshijnë mundësinë e ndërhyrjes në procedura dhe rrezikun për kryerjen e veprave të tjera penale, janë bazuar në një numër të madh faktorësh të individualizuar. Për këtë arsye, prokuroria vlerëson se asnjë kusht i mundshëm për lirimin, përfshirë dorëzaninë e propozuar, nuk mund t’i zbusë ato në mënyrë të mjaftueshme.