Dhoma e Tregtisë dhe Industrisë e Kosovës (DHTIK) organizoi një takim me përfaqësues të komunitetit të biznesit, ku u diskutua ndikimi i krizës politike dhe i shkuarjes në zgjedhje të reja në ekonominë e vendit. Takimi theksoi pasigurinë që këto zhvillime po krijojnë për bizneset dhe zhvillimin ekonomik.
Skënder Krasniqi, kryetari i Bordit të DHTIK-së, dhe Hamdi Malushaj, kryetari i Kuvendit të saj, vlerësuan aktivitetin e Dhomës në adresimin e sukseseve dhe problemeve të sektorit privat, pavarësisht sfidave që nga fillimi i vitit të kaluar.
Kushtrim Ahmeti, drejtori ekzekutiv i DHTIK-së, deklaroi se zgjedhjet e shpeshta po prodhojnë kosto të drejtpërdrejta për ekonominë. Ai shpjegoi se "çdo proces i ri zgjedhor nënkupton muaj të tërë të humbur për vendimmarrje dhe projekte zhvillimore. Kjo po u kushton bizneseve vonesa, humbje financiare dhe pasiguri të mëdha për të ardhmen dhe investimet. Ekonomia nuk mund të presë pafundësisht cikle politike – ajo ka nevojë për stabilitet të menjëhershëm".
Përfaqësuesit e bizneseve shpalosën sfida si rritja e kostove të prodhimit, varësia e lartë nga importi, mungesa e mbështetjes institucionale dhe vonesat në vendimmarrje.
Ata vlerësuan rolin e DHTIK-së në lobimin për zgjidhje konkrete, propozimin e politikave lehtësuese dhe ndërmjetësimin e komunikimit midis institucioneve dhe sektorit privat.
Në përfundim, të pranishmit u dakorduan për nevojën e stabilitetit politik si parakusht për zhvillim ekonomik të qëndrueshëm dhe për intensifikimin e bashkëpunimit për mbrojtjen e interesave të bizneseve.