Dhoma e Tregtisë dhe Industrisë së Kosovës (DHTIK) ka shprehur shqetësimin për zhvillimet e fundit në Lindjen e Mesme, të cilat po reflektohen në rritjen e çmimeve të derivateve të naftës në vend, sipas një komunikate të publikuar më 3 mars 2026.
Sipas komunikatës, kriza po zgjerohet dhe paraqet rrezik të madh për sektorët ekonomikë, duke rritur kostot e transportit, prodhimit të produkteve ushqimore dhe shërbimeve bazë. Kosova importon 100% të karburanteve, çka ndikon drejtpërdrejt në ekonominë vendore.
Kjo situatë do të rrisë kostot e prodhimit për bizneset vendase, do të ulë konkurrueshmërinë dhe potencialin për eksport, i cili është goditur nga rritja e çmimit të energjisë dhe liberalizimi i saj. Mund të çojë në rritje të inflacionit dhe të kostos së jetesës për qytetarët.
DHTIK i bën thirrje institucioneve për veprime të menjëhershme, duke filluar me një dialog me komunitetin e biznesit për identifikimin e sfidave dhe gjetjen e zgjidhjeve të përbashkëta. Mes propozimeve janë ulja ose pezullimi përkohëshëm i disa taksave për bizneset më të prekur, si dhe rishikimi i barrës tatimore për produktet esenciale.
Këto masa synojnë zbutjen e ndikimit tek konsumatorët dhe mbështetjen e prodhimit dhe eksportit vendor. DHTIK deklaron se është e gatshme të ofrojë kontributin e saj për tejkalimin e situatës dhe sigurimin e stabilitetit ekonomik.