Një ngjarje e rëndë është regjistruar në qytetin e Shkodrës, ku një 23-vjeçare është bërë viktimë e një sulmi fizik brenda ambienteve të banesës së saj. Sipas njoftimeve zyrtare nga Policia, incidenti ka ndodhur mbrëmjen e së dielës, rreth orës 22:20, në lagjen “Xhabije”.
Sipas të dhënave, autorët kanë hyrë në banesën e shtetases O.N., ku më pas e kanë dhunuar atë. Pas ndërhyrjes së forcave të rendit dhe dërgimit me urgjencë në institucionin shëndetësor, e reja po merr ndihmën e nevojshme mjekësore në Spitalin Rajonal të Shkodrës.
Grupi hetimor, nën drejtimin e autoriteteve, po kryen veprimet procedurale për dokumentimin e plotë të ngjarjes. Aktualisht, fokusi i policisë është përqendruar në identifikimin e personave të përfshirë dhe zbardhjen e motiveve që çuan në këtë incident. Policia ka konfirmuar se hetimet janë në vijim e sipër për kapjen e autorëve, të cilët mbeten ende të paidentifikuar.
Përditësime
Policia e Shkodrës konfirmoi se në dhunimin e 23-vjeçares O.N. janë përfshirë dy autorë. Ngjarja është regjistruar mbrëmjen e së dielës, më 9 gusht.